Rubén Novo
Miudiño Sessions #27 – Pauliña
🎥 [21.03.24] MIUDIÑO SESSIONS #27 – PAULIÑA Desta volta A Regueifa Plataforma achegouse até Silleda para filmar a sesión de Pauliña, unha das voces propias con máis personalidade da escena galega. Fronte a un muro de motores que agardaban solemnes unha segunda vida a cambadesa teceu na compaña da súa banda a súa habitual mestura de estilos en tres pezas (Fame, Pasa de min e Fáltame o aire) nas que, coa dominancia cromática punk marca da casa pauliana, o urdime se foi tinguindo dunha policromía que foi do rock, ao blues ou ao raggamuffin. Un saboroso petisco audiovisual para ir abrindo boca na véspera mesma da saída do seu novo disco, GALEGO IS NOT DEAD
🔴 Vixésimoseptima entrega das Miudiño Sessions, un proxecto non comercial de difusión da nosa cultura, feito dende a paixón pola nosa música e lingua que máis alá da promoción de novas propostas, o descubrimento das máis singulares e o rexistro das máis veteranas tamén ten un certo propósito arquivístico, facendo a foto fixa do momento histórico que estamos a viver, por número e por calidade, de proxectos musicais na nosa língua.
🌀 Link en www.aregueifa20.net e na nosa canle youtube.com/@aregueifa20