helerna

HELENA VILLAR JANEIRO: NON É DOADO O CANTO EN REBELDÍA (Recén chegado no nº 20 da Revista Lucense de Poesía Xistral)

Publicado el 11 noviembre, 2017 | Literatura, Prensa

Helena Villar Janeiro

NON É DOADO O CANTO EN REBELDÍA

(Recén chegado no nº 20 da Revista Lucense de Poesía Xistral)

Mentres o mar se achega manso a unha praia arousá 
a me bicar os pés
e sangran as camelias a beleza encarnada
que a terra lles achega ata as raíces,
aló ao lonxe matan o futuro
dentro das criaturas que a derrubos e a balas
arrepían co último laído, cando non é ao mar
a quen o seu silencio corroe nos abismos
en tanto que non cuspe os seus cadáveres
a un areal que os vara
e alí os colle alguén, os leva á supultura
e lles recobra o nome esvaecido
nas augas do seu tránsito.

Porque a xeometría non contaba
nin cos perfís de Alepo
nin cos planos crebados por pinchos e coitelas,
nin cos millóns de pingas que se xuntan na beira dunha onda
e soldan aceiradas ese borde
que gadaña os navíos de xoguete a trasportar fuxidos
a quen a morte lles importa pouco
se non a pode mellorar a vida.

Non é doado o canto en rebeldía
se oes cantar o merlo,
comes pan
e miras para a lúa
sempre na mesma fiestra onde te agarda
cama quente e mulida.

Non é doado o canto,
ningún canto,
se o sangue é a navalla que te crava
para que xa por sempre negues o paraíso,
calquera paraíso,
incluso o da habelencia de poeta.

(Foto Helena Villar Janeiro cortesía de loqueyotedigo.net)

¿Te gusta este artículo? ¡Compártelo!

Deja un comentario

Tu dirección de correo electrónico no será publicada. Los campos necesarios están marcados *