Formulario de acceso protexido por Login Lockdown

 Luns, 23 de abril de 2018, ás 19 horas

Salón de actos da ONCE no Cantón Grande da Coruña

Participantes (todos eles estudantes da USC en 1968):

Francisco Cerviño González, estudante de Medicina

Mari Luz Canal Paz, estudante de Dereito

Francisco Álvarez Fontenla, estudante de Ciencias

Camiño Noia Campos, estudante de Filosofía e Letras

Actuación musical de Miro Casabella

Presentación:

Manuel Monge, secretario do Foro Cívico

Hai que recuperar a memoria histórica e o contexto represivo, cunha Lei de Prensa de Manuel Fraga que multaba aos xornais, simplemente por informar.

Contaremos con persoas que estaban alí como estudantes e que hoxe pasan dos 70 anos, significados profesionais, profesoras/es de universidade.

Miro Casabella, tamén protagonista, cantará o “Venceremos nós” e outras cancións moi coñecidas naquela época.

Un acto importante, organizado polo club de opinión Foro Cívico, para rexuvenecer 50 anos; para aprender do pasado e conquistar o futuro.

E recuperaremos algunhas daquelas frase que aparecían pintadas nas paredes: Cambiar a vida, transformar a sociedade. O deber de todo revolucionario é facer a revolución. Sexan realistas, pidan o imposíbel.

Na Universidade de Santiago de Compostela (USC) –tiña, daquela, só seis facultades– o “Maio do 68” de París foi realmente en marzo dese ano. En París a universidade da Sorbona foi pechada e a policía tomou a cidade. Traballadoras e traballadores presentaban tamén as súa reivindicacións e Francia quedou paralizada por unha folga xeral. As eleccións de representantes do estudantado na USC o 10 de novembro de 1967 fortaleceu o Sindicato Democrático de Estudantes. A actuación do decano de Ciencias, Joaquín Ocón, suspendendo actos culturais e declarando ilegal un boletín desa facultade, provocou o inicio dunha loita con 110 días de folga, manifestacións que deixaron 13 detidos; folga xeral en marzo e peche de tres días no edificio central da USC con asembleas de máis de 2.000 persoas, como resposta á expulsión de sete estudantes da universidade e perda de matrícula para outros seis.

Esta represión non era un caso illado porque o 28 de marzo de 1968 o goberno franquista pechaba a Universidade Complutense de Madrid por tempo indefinido; o 31 de maio secuestraba o diario Madrid; o 3 de agosto declaraba o Estado de Excepción en Guipúscoa; o 17 de xaneiro de 1969 é asasinado en Madrid en dependencias policiais o estudante Enrique Ruano, e o 25 de xaneiro de 1969 o Goberno declaraba o Estado de Excepción en todo o Estado, que se prolonga até o 25 de marzo, con detencións masivas e confinamento de moitos intelectuais.

A loita do estudantado da USC polas súas reivindicacións foi tamén unha loita contra a represión da ditadura franquista. Represión da xustiza a través do Tribunal de Orde Pública (TOP); represión das chamadas Forzas e Corpos de Seguridade do Estado con decenas de feridos polas cargas policiais; represión contra os medios de comunicación, en aplicación da Lei de Prensa e Imprenta (LPI) de Manuel Fraga, que entraba en vigor en marzo de 1966. Só de abril de 1968 até abril de 1969, Fraga abriu 201 expedientes administrativos e 118 acabaron en sanción. La Voz de Galicia foi un dos xornais que recibiu máis sancións por informacións relacionadas coa folga de estudantes: multa de 12.500 pesetas o 17 de xaneiro de 1968; 10.000 o 27 de xaneiro; 12.500 o 9 de marzo; 10.000 o 10 de marzo e 10.000 pesetas o 12 de marzo. Pouco despois, o 26 de xullo de 1968 Fraga multaba con 50.000 pesetas ao subdirector de La Voz de Galicia, Francisco Pillado Rivadulla, que exercía de director por ausencia do titular. O “delito” foi a publicación do artigo de Augusto Assía “Sobre el idioma gallego”. Cinco meses despois Fraga era nomeado “Fillo Adoptivo” da Coruña.

(Foto portada cortesía de escolar.net)