Rubén Novo
PREME NA LIGAZOM
Néstor Rego defende no Congreso acabar coas peaxes da AP-9 (youtube.com)
Iniciar o rescate da AP-9, que o Ministerio de Transporte realice o estudo sobre o custo do rescate e desbloquear a transferencia da infraestrutura á Galiza: propostas do BNG
O deputado do BNG no Congreso, Néstor Rego, defendeu a moción, consecuencia de interpelación, da frente nacionalista apelando o voto favorábel do resto de grupos para instar o Goberno do Estado inicie a realización dun estudo para o rescate da AP-9, execute o rescate e axilice a transferencia da Autoestrada do Atlántico á Galiza. O BNG, na súa loita por conseguir o obxectivo de que as galegas e galegos teñan unha “AP-9 galega e libre de peaxes”, defende a necesidade de rematar coa estafa legalizada das peaxes da Autoestrada e a discriminación que sofre á Galiza que lastra a economía das familias e empresas galegas.
“O que o BNG propón nesta moción é que o Ministerio de Transportes, comece por realizar un estudo propio sobre a mellor formulación xurídica e o custo que tería o rescate” sinala o deputado nacionalista. Non parece serio, continúa, rexeitar esta proposta -unánime, por certo, no Parlamento da Galiza- sen analizar primeiro como e canto vai custar. “Nós temos a certeza de que o rescate será bo para os galegos e galegas e tamén para as arcas públicas” afirma Rego.
A respecto do rescate, sinalou o deputado do BNG, existen algúns xa realizados e publicados como o encargado pola organización nacionalista á Universidade da Coruña que estipula o rescate en 904,7 M€. “Quero lembrar que en 2018 Globavia adquiriu unha parte do grupo Itínere valorando o total das accións do grupo en 1 300 M€. Porén, dentro deste grupo existen máis activos que a AP-9 polo que debe valorarse a porcentaxe que representa a concesión desta autoestrada necesariamente inferior” reforza con este novo argumento a necesidade de rescatar esta autoestrada.
“Esta actuación do Goberno, o rescate, continuaría sendo a máis vantaxosa para o Estado e tamén para os galegos e galegos” subliña Rego. De facto, lembra que un ditame do Consello de Estado para a tramitación das bonificacións indicou que “só por este concepto o Estado deberá pagar a Audasa até 2048 2 394,5 M€ -bastante máis, se incluírmos as portaxes na sombra-, resulta que rescatando a Autoestrada do Atlántico o Estado aforraría aproximadamente 1 489 M€”.
Avanzar e desbloquear a transferencia da AP-9 á Galiza
“Incorporamos ás propostas de resolución, axilizar a transferencia da Autoestrada do Atlántico, que está a tramitar este Congreso por petición unánime do Parlamento da Galiza” indica Rego. De facto, o deputado nacionalista lembra que é a quinta vez que a Cámara Galega o acorda. “Catro veces debatido e aprobado aquí. A quinta, infelizmente, foi impedido mesmo o debate pola maioría do Partido Popular, con Ana Pastor á frente da Mesa deste Congreso” denuncia. Non ten sentido, evidencia Rego, continuar a demorar unha tramitación que debe concluír canto antes, mesmo por respecto á decisión unánime e soberana do Parlamento da Galiza.
PREME NA LIGAZOM
BNG consegue que o Goberno aprobe a tramitación de urxencia para as novas bonificacións da AP-9
O vindeiro martes, 15 de outubro, o Consello de Ministros dará luz verde ao inicio do trámite para as novas bonificacións da Autoestrada do Atlántico
“A concesión da AP-9 está condenada a desaparecer moito antes de finalizar pola vía xudicial. Non se empeñe en continuar castigando os galegos e galegas” Rego, a Puente
O Bloque Nacionalista Galego consegue un acordo co Goberno para iniciar os trámites que permitan a aprobación das novas bonificacións a usuarios recorrentes e superrecorrentes da Autoestrada do Atlántico. Rego interpelou o Ministro de Transportes e Mobilidade Sustentábel apelándoo a rematar coa grave discriminación que sofre á Galiza a respecto das peaxes da Autoestrada do Atlántico. O deputado do BNG, Néstor Rego, demandou ao Ministro a iniciar os trámites para o rescate da AP-9, sendo a solución máis xusta e beneficiosa para o interese público, e axilizar a transferencia da Autoestrada que se está a tramitar no Congreso.
Luz verde a impulsar as novas bonificacións da AP-9 de até 75%
O Ministro de Transportes e Mobilidade aproveitou a interpelación para, en consonancia co acordado co BNG e co obxectivo de cumprir o Acordo de Investidura, anunciar que no vindeiro Consello de Ministros, o vindeiro martes -15 de outubro-, se aprobará a tramitación de urxencia para as novas bonificacións da AP-9. Unha cuestión da que o deputado do BNG fixo fincapé porque “é evidente que aplicar o previsto no Acordo de 2020 foi un avance que logrou aliviar a carga para as persoas e empresas que teñen que usar esa vía de forma habitual. Agora corresponde amplialas segundo o previsto”.
Cuestións pendentes que abren a porta a unha “AP-9 galega e libre de peaxes”
E tamén, engadiu Rego, “axilizar a transferencia da Autoestrada do Atlántico”, que está a tramitar este Congreso por petición unánime do Parlamento da Galiza. “Non ten sentido demorar máis esa tramitación. Por iso esperamos que a maioría da Mesa conformada polo seu partido e por Sumar non adíen máis o trámite e poida ser concluído canto antes” subliña o deputado do BNG.
Así mesmo, e co obxectivo de conseguir, máis cedo que tarde unha “AP-9 galega e libre de peaxes”, Néstor Rego sinalou a necesidade de rematar coa discriminación que sofre á Galiza que significa que “os galegos e galegas continúen pagando portaxes durante 24 anos máis -cando xa van 51- sobre todo castigando os traballadores e traballadoras que teñen que utilizar esa vía a diario e as empresas que teñen que utilizala para mover os seus produtos”.
“Nin é xusto nin é aceptábel. Os galegos e galegas non estamos dispostos a aturar máis discriminacións” incidiu Rego facendo mención a que, o PP é, hoxe por hoxe, “totalmente responsábel de que os galegos e galegas continuemos pagando peaxes e que os deputados e deputadas galegas colaborasen nunha decisión contra a Galiza, contra os intereses do noso País”.
Cabe destacar que esta última reflexión foi partillada polo Ministro de Transportes que lembrou que a última prórroga da concesión foi aprobada por un Goberno do Estado presidido por Aznar e unha Xunta de Galiza presidida por Fraga Iribarne: “o PP castiga á Galiza” sinalou.
“A concesión está condenada a desaparecer” di Rego
Á situación xurídico-económica da Autoestrada, e ante a solicitude do BNG de realizar -tal e como demandou no seu momento a través dunha moción aprobada polo pleno do Congreso en xuño deste mesmo ano- un estudo para o posíbel rescate da AP-9, o Ministro de Transportes, Óscar Puente, abriuse a estudar esta posibilidade e “encargar un informe” e afirmou que o Goberno son conscientes da situación inxusta que supón para os galegos e galegas seguir pagando estas peaxes.
“O BNG encargou un informe á Universidade da Coruña, realizado por dous profesores, con rigor técnico e xurídico, e que dá como resultado que a cantidade que custaría acabar coa concesión é bastante menor que a que vostede sinala: 904,7 millóns de euros” lembrou o deputado do BNG no Congreso durante a interpelación. Entre outras razóns porque, ao tratarse dun contrato ilegal, e por tanto anulábel, a concesionaria “non tería dereito a indemnización por lucro cesante, tal e como recolle o Tribunal Supremo nunha sentenza ditada en 2022”. Neste sentido, Rego entregou unha copia do informe ao Ministro e Puente recibiu o informe e afirmou que o ministerio estudará esta proposta.
Por último, o deputado do BNG lembrou que a Unión Europea abriu un expediente de infracción ao Estado español pola prórroga por considerala que non se axusta a dereito por non respectar o criterio de concorrencia competitiva. Se Goberno se empeña a defender o mantemento da concesión, alerta Rego, estará a se facer co responsábeis dunha inxustiza e mesmo, con certeza, dunha ilegalidade. “Sabe perfectamente que a concesión da AP-9 está condenada a desaparecer moito antes de finalizar pola vía xudicial” sentenza Néstor Rego.
MÁIS INFO: